Fašenjski odbor je na svoji godišnji skupštini, pod predsedanjem uvaženoga gospona Vrapca, pretepel sve lanjske probleme i dileme, zgode i nezgode, komedije i tragedije, zafrkancije i huncvutarije, svinjarije i pizdarije koje su se lanjsko ljeto pripetile v ljepi i dragi nam Dobravi.
Preteplji smo se dobravske vuljice i kraje, se udruge i društva, se doktore, veterinare i zubare, zadrugare, vinogradare i podrumare, krčmare, kuhare i konobare, mesare i pekare, zidare i tesare, eljektričare i dimnjačare, malare i grobare, gumače i pumpače, šnjadere i šujstere, vozače, pešake, automobiliste, bicikliste i traktoriste.
Isto tak smo preteplji se one koji delaju, ali i one druge koji ili nemreju ili nečeju delati, se komedijaše i lakrdijaše, nogometaše, košarkaše i kuglaše, vatrogasce, lovce i krivolovce, slogaše i dobravske puhače, zdrave i betežne, oženjene i neoženjene i se druge naše mangupe, zafrkante i zajebante.
Naljuknuli smo se i v Općinu i pogljedali kaj delaju načelnik i zamenik, predsednik vijeća, njihovi tajniki i blagajniki, pročelnica, čistači i redari, a zeznali smo da na novo imamo i vježbenicu, a bogme i jako puno novih općinskih dušebrižniki. 
Fašenjski odbor je donesel odluku da se na denešnji den to se obznani celji Dobravi. 
No, prejdi nego čujete se naše huncvutarije,  štelji bi vam još jempot reći da se „Vrabec na pesku piše, a dok dojde veter,  se se zbriše!“
Isto tak ako se što nutri prepozna, nek mam z nosom ne zavija jer je to  samo još jena fašenjkova huncvutarija. 

1 Plovi, plovi lađa dok ne potone! Ali je ne dobro ako si v lađi ti. Tak su dečki išli prek Drave i tud Mađarom tudom, tudom. A de si ti? Javi se!
Šifra: Ciganček

2 Za Martinje bi prosili - menje piti. More vas glava zaboljeti, a morete i zabloditi pak mesto dimo v drugo krčmu diti.
Šifra: Sveta Marija, vozi Miška

3Nekoji Dobravčani su se pripravljali za rat z Rusima. Vu to su svrhu na Dravi – nasred pota – skopali rovove za skloništa ili morti protiv tenki… Srećom, od rata nebu nikaj pak su unda te rovove nazaj zametali.Šifra: Stup sramote

4 Naši su lovci najaktivnija udruga (A zna se i zakaj!). Ne nekoji od njih ne znaju kuljko koštaju jeni jelenski rogi, a kamoli dvoji rogi. Sreća je kaj te naš lovec ima dobru ženu koja za njim se plaća.
Šifra: Besni lovac

5 Vrabec je otkril tajnu zakaj za Božić i Novo ljeto nega snega. Za to su zaslužni stanovniki Beverli Hillsa koji su puščali raketljine na oblake. Zato Vrabec predlaže kaj se te raketaše zaposlji v  Općini na sljužbu obrane od tuče. Bolje i to nego kaj ljude i peseke po kraju bese.
Šifra: Kod Esterajh-tima raketljina dosta ima – ili – Baloni mesto vatrometa

6. Vrabec prosi dotepenca z vulice Matije Gupca nek ne napada se okolji sebe pak i svoje i susede uznemirava. Unda ih oni v plavim uniformama moraju dojti mirit. A moglji bi mu njegvi i čerljenoga kartona dati ili – ako bu tak i dalje – kartu z Dobrave v jenem smeru.
Šifra: Do Ivanovca dug je put. 

7. Recept za alkoholičare koji očeju ostati trezni. Došlji dečki s posla, v podrum si seli, ali su ne imeli kaj piti. No, ako su već v pelnici, zakaj si nej nekaj ipak nekaj spili. Am je i voda dobra ako vina nega.
Šifra: Važno je piti

8. Naši labdoritači na veljko se pakuju v prvu ligu. Vrabec skromno misli da je to za njih ipak -premalo. Kuljko stranjski igrači ima naš klub, čisto bi mogli malo razmisliti i o Europskoj ligi. A ako koji sfalji, morti i Filipinci pomoreju.
Šifra: Ima se, more se.

9.Prosi se načelnik kaj napraji još jenu cestu od Vidovskog mosta do Dobrave. Po nje bi se vozili samo auti s prikolicom na kojima su čamci. Tak – ako se prikolica otkapči, a čamac napraji kolut napred – ostali promet more normalno iti po stari cesti.
Šifra: Kud plovi ovaj brod

10 Vrabec čuje da se v centru otpira novi ugostiteljski obrt – stara-nova slastičarnica. Posla sigurno bo jer se sladoled, soki i ostala pijača bodo tržili pod vedrim nebom.
Šifra: Lipe cvatu, lova do krova, a krova nega

11 Oprez s priključnim vozilima: dečki došli po kocenje, zakapčili prikolicu, ali krenuti – nikak. A i kak bi dok nega kotači na prikolici.
Šifra: Muzge

12 Si znamo da v naši općinski većnici zna biti burno. No ima tam i jena pametna  ženska glava koja je još nigdar nikaj ne rekla niti pitala, ali je za vladajuće navek fljetno roko zdigla. Vrabec ne zna je li to ono „Šutnja je zlato“ ili pak je f pitanju zavažanje grunta uz gradnju kanalizacije ili ketering za pedeseti rođendan ili još nekaj drugo za kaj Vrabec još ne doznal.
Šifra: Šutnja je korist

13. Dobravska estradna pjevačka zvijezda širi svoje aktivnosti. Uz to kaj je postal zvezda šou-biznisa, on je i zabavljač gostiju raftingaši v turistički zoni Fizeš, a ako treba i kuharu pomaže kaj nahrane gladne aktiviste na vodi. Po potrebi more biti i skiper.
Šifra: Sve radim samo da ne radim

14 Sreća kaj je kanalizacij skoro gotova pak nam nado radoznale penzionerke već v opasnosti. Jena je bila tak radoznala kaj se je v saku jamu i ljuknju štela naljuknuti i to se tak dogo dok je ne nuter pala.
Šifra: Znatiželja je ubila mačku

15. Iseljavanje prijeti i općinarima: Vrabec je primetil da općinski delatniki tu i tam delaju vuni. Za ve je to – srećom – samo v drugim općinama, ali što zna kaj bu drugo ljeto. Vrabec jedino ne zna što je plačal našega radnika: mi ili oni.
Šifra: Svetomarski farof

16 Potpore za mlade deliju se v naši općini. No, Vrabec je dobil pritužbe da općinsko veće te potpore ne delji baš pošteno, nego bolje onak – kak paše čelnom čoveku našega općinskoga veća. Ako je i tak, neje strašno – važno je da se potpore daju.
Šifra: Čast svakome, potpore mojemu.

17. Dragi Dobravčani, pazite koga zovete na doček Novoga ljeta kaj vam se gosti nej tak opustili kaj se na becikljinu nej znali niti peljati niti dimo dojti niti na cesti ostati, nego v grabu opasti.
Šifra: Ljevo, desno nigdje moga doma

18 Ako je dosta, dosta je. Ako nemreš već piti, prestani. I mamica su rekli: Ako već piješ, pij v rit, a ne v glavu. No nekojima našima se to malo pobrkalo – jen je dečko pil v glavu, a dobil je – z nogom v rit.
Šifra: Svi pjevaju

19Ljepo se družiti, osobito ako se dela o penzionerima. No, oprez! Dragi penzioneri, pazite na svoje prijateljice koje dopeljate v svoje hiže. Vrabec doznaje da je jen naš penzioner, nakon druženja, otpeljal dimo svoju prijateljicu, ali je ne znal da z njom otpeljal i svoje peneze.
Šifra: Ljubav obostrana, ali penezi su – ipak – moji 

20. Karavana s čamcima kasnila je dve vure. Pitate se zakaj! Pak, kriv je jen naš dobravski zet. Bogec je v šatoru spal, a njegov test ga je ne vupal zbuditi. Vrabec ne zna je li v pitanju ljubav ili strah. Dobro je imeti po malo od jenoga i drugoga, ali ne treba pretirati.
Šifra: Po šumama i gorama

21.Znamo da je Njemačka jako organizirana i disciplinirana zemlja. Nažalost, naši ljudi koji tam delaju na to se teško privikavaju. Tak saki pravi Nemec zna do posle fešte dimo treba iti, a ne kak jen naš gastarbajter koji s fešte – mesto domaj – v jarku na sredini pota na Dravi završi. Sreća kaji su policajci vidlji njemačke tablice, pak su samo z rokom odmahnuli i pošteno dimo odišli.
Šifra: Jarekštrase

22 Pazimo na sebe, pazimo na svoje hiže i grunte, pazimo na aute, ali pazimo i na naše kućne ljubimce – peseke i mačke. Zato dobro pazite kaj budu vaši ljubimci dobro nahranjeni i ljepo počesani jer nešto i na to jako pazi. Na gine vam jezikova juha, a morti i na sud pete.
Šifra: Dobravski azil

23.Si koji imamo vozačku dozvolu znamo za kaj smo ju dobili: ili za auto, ili za traktora ili za motora… A ne kak dve naše penzionerke koje ne znaju da za vleči prikolicu punu kuruze od polja do kuružnjaka dozvola ne treba. Morti njim je tak bilo jednostavije. Ovak moraš traktora vun speljati, za prikolicu ga prikapčiti, pak ga otkapčiti i nazaj v garažu peljati.
Šifra: Vozačka v kobilaru, taktor v garaži – ili – Beri Beri Hils

24Kuljko jeziki govoriš, tuljko ljudi vrediš! To je istina, ali za neke to baš i ne vredi. Makar nas čudi kak bar nekaj malo mađarskoga ne znamo. A da bi bilo dobro znati, osvedočil se jen naš općinski sljužbenik. Na blagajni v Mađarski on počne vikati: Evo pina, pina! A blagajnica se začerljene, rasrdi se, nastane veljka gužva i dojdu zaštitari. I naš bi općinski sljužbenik i den denes bil tam da je ne bilo dobre veze i naoružane Zrinske garde. A neje bogec nikaj kriv: kaj on zna da to kaj je vikal ima saka žena – med nogami!
Šifra: Jezike uči i sretno putuj kući

25 Fnogi se naši penzioneri bave dodatnim poslovima. Penzija je mala, a saki euro dobro dojde. Vrabec je tak videl jenoga našega friškoga penzionera kak vleče čona z vode. Neje baš išlo pak se jako vuprel i nagnul tak jako da mu je mobitel z žepa vu vodu opal. Ali, znate, neje on nikaj kriv – žepi na njegvi šumarski jakni su se od pivi tuljko razvljekli i pomalji zdrapali kaj se mobitel niti ne mogel sigurno v žep posprajti.
Šifra: Jeni su žepi za mobitele, a drugi su za pive.

26. F kućicama pri Dravi se fnogo toga događa. Fala Bogu već se ne pljušćeju pri kartanju, nego su ve moderni plesi – z gumenim lutkama. Jedino bi plesači trebali paziti na strast pri takvem plesu kaj ga ljubavni i plesni zanos ne bi dolji hitil. Niti njegov nadimak ga je ne mogel spasiti – neje bil jaki kak stena.
Šifra: Ako je i lutka, jednako je opasna kao i žena, napumpana ili ne.

27. Već smo nekaj rekli o ratu z Rusima. Srećom i of je pokušaj na vreme sprečen. Naime, v jeni firmi – jako dobri firmi, ne delaju alkohola, nego soka – se dogodil napad. I neje šef napal radnika, nego radnik šefa. I morti s toga ne bi bilo nikaj da je v se ne bi zmešani i jen Rus.
Šifra: Dobrava njet Ukrajina

28. Ima v naši općini jen vježbenik za penzionera koji pomalji trenira za dopunske djelatnosti. Ima čovek traktora, prikolicu, sajle za vlječi i se kaj treba za noćni prevoz divljači. No, neje kaj mislite, neje on greznul v kriminal kako nekoji naši ministri. On prevoža samo ono kaj naši lovci strelje.  I se bi bilo dobro da je jempot ne greznul v blato tak fejst kaj se prvi kraj traktora skoro ne videl. Srećom, naša je država dobravske poljoprivrednike dobro opremila z pravimi, veljkimi traktori pak su onda oni – kak pravi profesionalci – spasili stvar.
Šifra: Z kancelarije v penziju, a ne v blato.

29.Noćne su vure duplo plaćene. Tak je Vrabec primetil jeno noć, okolji 11. vure, majstore kak na groblju klimu slažeju. Malo su im se koljena stepala, ali posla su ipak naprajli. Jedino je ve pitanje bodu dobili samo plačene noćne vure ili bo gazda dal još i kaj kcoj za pretrpljeni strah.
Šifra: U strahu su klimave noge, ali dobre dnevnice.

30. Jako je ljepo kaj se nekoje naše žene bave sportom. V tom i njim i naša općina pomaže: kupila im je stola za stolni tenis i dala prostora za igru. Ali je Vrabec doznal da njim još neka falji. A to je WC ili, po domaćem, zahod. Zato prosimo načelnika nek njim nekak zrihta još i to sitnicu kaj nejdu nuždu – veliku ili malu –  nejdu delat v prirodu, za drevo ili za nečije aute.
Šifra: Kaj se mora, se mora

 31. Naši Slogaši su jeno od boljih društvi v našem selji. Ali i njih je ova Korona malo zmela: zabili su kak se ide na nastupe, a još važnije – kak se ide z nastupa dimo.  Nastup je prešel kak je prešel, ali problem je bil dimo oditi. Si se skute v autobusu, šofer oče krenuti, ali – stop! Jenoga člana nega. Mam se jen javil kaj ga pe iskat. A znate kam – v krčmu!          Čekaju Slogaši, čekaju, ali nega niti jenoga niti dugoga. Pak su unda trećega poslali. Niti njega nega. Pak još jenoga, i još jenoga dok je – na kraju – ne pol autobusa faljelo. Unda su već nikoga ne pošiljali kaj v autobusu ne bi ostalji samo predsednica i vozač
Šifra: Bermudski trokut usred Županje  

32. Vrabec je seznal za nesrečnu podjelu dravskih rančera na dva dela. Jeni imaju svoje farme, vikendice ili kak se to već zove z jene strani jarka, a jeni z druge strane jarka. Neje to baš jako široki niti jako glaboki jarek, ali dosta kaj se čovek v njega skrije. A za to su ga i iskoristila dva uzvanika na proslavi jenoga rođendana. Z ranča gospona načelnika delegacija od dva člana misteriozno je nestala v sitne noćne ili rane jutarnje vure (Kak vam paše!) Moži su krenuli dimo, pešice – kak se nakon dva-tri gemišta i fšika. No, nesu dalko došlji. Put od vikendice do doma je jako dugi pak su si naši moži zelji malo odmora. A za mesto odmora su zebrali – jarka. Tak su se ljepo smestili vut jarek kaj je pitanje bi li i den denes došlji dimo da su ih ne našli pajdaši – koji su pošteno – v jutro, po svetli išli dimo. 
Šifra: Kaj me bantuješ, tu mi je baš ljepo

33. Jena je udruga organizirala posjet koncertu „Lada“ u Varaždinu. Skutilo ih se je nekaj, ali  problem – što bo peljal. Srećom, javila se jena članica koja bu decu sigurno i na vreme vu Varaždin otpeljala. Na kraju je ispalo da je vožnja bila zanimljiveša od samoga koncerta. Tri put su cestu fuljali, peljali se po krivi traki (kaj su ostali auti na cesti pozdravljali mahanjem šake i besnim trubljenjem), pri puni brzini preljeteli se varaždinske ležeče policajce i za dlaku izbegli tri saobračajke (Pa kak se ovi Varaždinci voze, sram ih bilo!) Dok su mladi pitali malo starešu članicu koja je bila za volanom elj zna puta i je li se v redu, ona je mirno odgovorila: Nikaj se najte. Se v redu. Ja poznam Varaždina bolje nego Čakovca i Koprivnicu skupa. Još malo i tam smo! 
Šifra: Plavušama niti za volanom ne treba verovati – ili – Jebote Lado, ovo je priredba!

34. Uprava Seljačke sloge obaveštava se svoje članove da su prostorije udruge ne mesto za ostavljanje i pohranu osobnih stvari. Jen se dugogodišnji član tak prifčil na prostorije društva kaj se skoro i preseljil v njih. Da se god kaj čistilo, nevek se tam najdo ili njegove patike, ili majice, ili hlače… Dobro, gače su još ne našli, ali što zna! Dobro je kaj imaju dobru predsednicu koja mu je stvari ne hitila vun na vuljicu, nego ih posprajila tam de metle stojijo.
Šifra: Ured za izgubljene stvari je u prostorijama KUD-a

35. Neje ljepo nepozvani niti v tuđu hižu dojti, a kamoli na tuđu respravu.  I još unda tam pred decom pokojnoga mahati s paperom da je pokojni jotec ne svoji deci grunta ostajil, nego tome nepozvanome. Prosi se dotični gospon kaj se drugi put, ako mu još nešto grunta zapiše, nek se na respravu najavi. 
Šifra: Deca, moja deca, nikaj nate mela

36. Si pamtimo svetsko nogometno prvenstvo. A posebno ga bo pamtil jen naš navijač. Igramo z Japanci. A on se, te naš navijač, Bogu zavetuval da pe zutra vjutro na zornicu ako naši pobede. I znate kak je bilo – komaj i komaj smo ih dobili na penale. V jutro se, bogec, rano stal i spakoval se k zornici. No, dok je poceka prekoračil, jena mu se štenga pod nogom zmeknula. I tak je mesto v cirkvi završil v krevetu s potrtom glavom. 
Šifra: Što zna, morti Bog „Niks feršten dojč“

37.I za kraj još jena narodna mudra izreka: Mamu i japu ti Boga da, a pajdaše si sam zbiraš. A to jako dobro znaju nekoji naši Dobravčani i – nedaj Bože – kaj bi se mojemu pajdašu nekaj na žal naprajlo. Pak je tak jen naš – već pomalo bivši – Dobravčan imel probleme na poslu. Znate, posel je odgovoren: uniforma, granica, uvoz-izvoz, penezi sim-penezi tam. I tak je te naš malo krivo skrenul. Ali, unda deju ne red pajdaši: nikve kazne, nikvi rešti, nikvo vraćanje penez! Mesto sega toga – drugo radno mesto.
Šifra: Ako imaš probljeme, zovi 112 

Presuda Fašenjku

Dragi Dobravčani i Dobravčice, ovo je se za ovo ljeto: skoro 40 pritužbi na našeg nečastivoga Fašenjka. Dok su to člani fašenjskoga odbora vidlji, bili su jako zadovoljni i ponosni na se nas. Pred 10, 15 ljet smo imelji i već od 50 točki. Unda su došla čemerna ljeta od 18, 20, najveć 25 točki.  A ovo je jako pohvalno jer ukazuje na sveukupni rast našega društva.  A to je pak dokaz da naša Vlada poduzima pravilne korake u oporavka i nastojanjima izlaska iz krize. No, kak bilo da bilo, i ovo malo zla treba pravedno osuditi. Zato, dragi naš Fašenjk, iz sega rečenoga vidi se da si ti jeno veljko zlo. I to zlo koje sako ljeto dojde nazaj. Mi te tu sako ljeto ljepo skurimo i dušu ti pošljemo v pekel. A ti? Kaj ti naprajiš? 
Mesto da ostaneš v peklu de ti je i mesto, ti se vrneš nazaj! I ne samo da se vrneš, nego ponovo delaš huncvutarije još vekše i još hujše nego lani. 
Posla nam zemeš, a ako i delamo, delamo za male plače. Naše mlade, a i fnoge stareše, tiraš vun nek si v tuđem svetu iščeju sljužbu.
Napeljaš nas na sakojačke bedastoće radi kojih na špot dojdemo i sramotu sebi i svoj familiji delamo. 
Ali ne bantuješ samo obične ljude, nego se v politiku mešaš. Posvadiš naše dobre političare koji se jako bore kaj nam v Dobravi bu ljepše i bolje. 
Je, tak je! Posvadiš ih pak su unda kaj rakova deca – saki na svoju stanu vlječe,  jen za drugoga govori da je lopov, da je nesposoben, da ništ ne zna i nikaj ne vredi. 
Naprajiš kaj saki samo sebe posljuša i mislji da je samo on pošten i dober i sposoben na vlasti biti, a si drugi da su niškoristi. 
I to ti je ne dosta, nego se i v zdravstvo i školstvo mešaš. Doktori je se menje, redi su se dokši, a ljeki se skoplješi.
A kaj si v školi naprajil? Naprajil si kaj ve i učitelji moraju nazaj v školu iti kaj bi decu po novem – za život! – znali vučiti. 
Dobro je to. Nek se i oni vučiji kaj budu još bolji učitelji. Samo se pitamo – koju budu decu vučili? A i za to si ti kriv: sako nas ljeto se već pod nerode otpeljaš, a se nas menje na svet doneseš.
Samo, zapamti si jeno: Kaj buš ti delal, ako nas ne bu?  S kim buš svinjarije speljaval, s koga se buš norca delal i koga buš svadil?
Zato, prasec jen stari, dok nas još jega, izričemo ti smrtnu kaznu za se kaj si naprajil.  Skurili te bumo z verom da ti je ovo zadnje.
Zbogom i nek ti duša v peklu zanavek gori kak bu ve zgorelo tvoje telo. Vužgite ga!